FANTATRAO VE NY ATAO HOE “FIFOHAZANA” ?

Raha ara-drafitra dia Sampana mitovy amin’ny Sampana rehetra eo amin’ny Fiangonana ny Fifohazana. Ny tsy azo lavina anefa dia fisehon-javatra (évènement) anankiray maningana anatin’ny tantaran’ny Fiangonana tao Madagasikara ny Fifohazana.

Raha araka ny tantara dia tany Soatanana, tànana andrefan’ny Fianarantsoa (51 km) no nihandohan’ny Fifohazana.

Ny Nahatongavan’ny Filazantsara tany Soatanàna :

1- Teo Antananarivo no efa nandray ny Filazantsara tamin’ny alalan’ny L.M.S. 1818. Ireo miaramila manam-boninahitra notendrena tany Fianarantsoa no nitondra ny Filazantsara tany.

2- Noho ny fanenjehana ihany koa nataon-dRanavalona I (1828-1861) dia maro ireo Kristiana nandositra niala an-Antananarivo koa niparitaka nandeha tany atsimo .

3- Ny L.M.S. (London Missionary Society) niorina tany Angletera tamin’ny taona 1795 no nitondra ny Filazantsara teto M/kara, ary nidina tany Fianarantsoa tamin’ny taona 1870. Misionera M.Richardson no niasa tao.

Ny toe-javatra nitranga – Very hevitra ny vahoakan’Andriamanitra :

1-Ny asan-dahalo : fangalarana omby sy ny fandroban’ireo dahalo ny fananan’ny vahoaka.

2- Ny areti-mandringana :tazo, namoizana aina’olona maro.

3- Ny menalamba: manenjika ny fivavahana Kristiana satria nentin’ireo Vazaha ary mamporisika ny olona hiverina amin’ny fanompon-tsampy.

Tao anatin’izany no vanim-potoana niaianan’Ingahy RAINISOALAMBO Razaimbola izay niandohan’ny Fifohazana tao Madagasikara.

RAINISOALAMBO dia nantsoina hoe Marambasia :

Olona voatokana mahazo mifampikasoka amin’ny andriana. Mpanompo sampy. Mpanao sikidy. Mpilalao ody. Mpanandro. Mpikabary mahay.sns…. Olona liana zava-baovao,

koa izany no nahaliana azy ny fivavahana Kristiana.

Sady Marambasia izy, Mpanao sikidy no Kristiana Katekista (Solompotandrina) : izany hoe kristiana sadasada (Syncrétiste). Nivavaka amin’ny fomba ivelany hita maso fotsiny.

Teto dia narary mafy izy, tsy nandaitra taminy intsony ireo ody sns…, nahantra, efa namoy fo koa…kanefa toa mbola nisy fanantenana ihany tao anatiny . Ny Hira faha-28 “zanahary tsy mba tia ny fahaverezanao…” (Vakio) no tonga matetika teo ambavany.

 RAINISOALAMBO NIOVA FO .

Tao anatin’izany raho-mainty izany no nanandratra ny feony tamin’ Andriamanitra izy. Izao no vavaka nataony “Mba afaho re izaho Andriamanitra ô!” , tsotra sady fohy . Nahita tory soamantsara izy ny ny alin’iny na dia tao anatin’ny aretina mangirifiry aza ary nanofy izy : Andro nifohazany : 15 oktobra 1894 “Nahita olona nitafy lamba fotsy madio mangatsakatsaka nitsangana teo anoloany, nijery sady onena azy. ..Dia nandidy azy mba hialany amin’ny odiny sy ny sikidiny ilay olona niseho taminy”. Rehefa nifoha izy dia sitrana soamantsara. Teto dia resy lahatra RAINISOALAMBO. fa Jesoa Kristy no namaly ny vavaka nataony, niteny taminy ary nanasitrana azy. Tapaka tanteraka ny heviny fa hanary ireo ody, sampy ary ny sikidiny rehetra izy. Ary dia nataony izany. Nariany tany andava-piringa avokoa izany. Fifaliana no tao ampony satria sitrana izy, ara-nofo sy ara-panahy: Tanteraka ara-bakiteny teo aminy ny tenin’ Isaia Mpaminany “Nitondra ny aretintsika rehetra Izy, sady nivesatra ny fahotantsika” 53/7. Lasa olom-baovao: olona mifoha niova fo lasa mpanaradia an’I Jesoa Kristy, mandalina sy mankamamy ny Teniny manda ny asan’ny Devoly tamin’ireny sampy sy ody ireny. Izay ny hoe FIFOHAZANA araka ny niainan’Ingahy RAINISOALAMBO azy. Ary tsy nijanona teo izy fa nizara ny fahasoavana noraisiny, mba hovonjena toa azy koa ireo olona naira-belona taminy. Ao anatin’ny aretina sy ny fahamaizinan’ny fanompon-tsampy.

Dia nanomboka teo ny fanapariahana ny asa Fifohazana : Manatanteraka ny atao hoe “Asa sy Fampaherezana” ,amin’ny teny frantsay dia “Ministère de la déliverance”. Nantsoiny tamin’ny fibebahana aloha ny olona hiala amin’ny fahazaran-dratsy ka hitodika amin’ Andriamanitra velona ka handray fanasitranana avy amin’i Jesoa Mpamonjy.

Tao Soatanàna izany no Tobim-pifohazana voalohany. Rehefa nitatra izany dia teraka ihany koa ireo Toby hafa toy ny : Manolotrony Ambalavao Tsienim-parihy. Mbola ao Fianarantsoa. (1900) – Mpitarika Neny RAVELONJANAHARY. Vatotsara Betafo – Antananarivo (1927). Mpitarika Baba RAJAOFERA. Ankaramalaza – Fianarantsoa (1941). Mpitarika Nenilava Volahavana GERMAINE -Farihimena – antsirabe (1945) – Mpitarika Pasteur RAKOTOZANDRY Daniel.

Raha mifototra amin’ny fampianarana ny Fifohazana Soatanàna dia toy izao no fombafomba niainan’izy ireo : Manao fitafiana fotsy avokoa ny olona rehetra. Mariky ny fahadiovam-pitondrantena; fotsy mitondra fahazavana…

Mizara telo lehibe ny ambaratongam-panompoana: Ny Mpiandry- Ny Iraka -Ny Raiamandrenin’ny Toby. Ny tsara tsindrina dia asa iandreketan’ny Fifohazana manokana ny “Asa sy Fampaherezana” sy ny “fandroahan-demonia”. Mitory ny Filazantsaran’ny Fibebahana ary mitory sy miasa amin’ny alalan’ireo Mpiandry ny fanafahana ny fangejana manjo ny olona : Ireo izay mbola voafatotry ny sampy, ody, sikidy… Ireo olona izay hitoeran-javatra hoy isika…Mpanandro, mpilaza ny ho avy (devin…) Voan’ny ambalavelona, misy fanahy ratsy…(possédé par l’esprit du mal)… Fa indrindra araka ny hita teo amin’i RAINISOALAMBO dia mametra-tànana @ marary, fanasitranana entin’i Jesoa Kristy. Na ara-nofo izany na ara-panahy…

Ny nipohirana dia iray ihany fa ny fomba fiasa dia samy manana ny maha-izy azy manokana. Ohatra ny amin’ny fitafian’ireo Mpiandry : Ny ao Soatanàna dia samy mitondra ny akanjo fotsy ny Mpiandry lahy na vavy. Ny lehilahy no mitondra saron-doha (mba ho fihatahana amin’ izay tsy masina p29). Ny ao Ankaramalaza kosa dia ny vehivavy no mitondra ny sarondoha.

Ireto avy ny andinin-tSoratra Masina hanorenana izany asan’ny Mpiandry izany (araka ny fampianarana ny Fifohazana Ankramalaza) :

Jaona 14/12-17

Marka 16/15-20

Matio 18/18-20

Jaona 20/21-23

Ireo Mpiandry no manatanteraka ny « Asa fampaherezana sy ny fandroahana demonia ». Nianatra manokana ny amin’ izany izy ireo ary natokan’ny Fiangonana, nametrahan’ireo Mpitandrina tànana rehefa nianatra izany asa izany nandritra ny 2 taona . Araka izany dia hiady amin’ny fanahy ratsy no tena asa goavana hiandraiketan’ izy ireo. Mila fanamasinam-pitondran-tena izany. Mila fandavana izay tsy masina. Tokony tsy hisy tsiny ihany koa ny Mpiandry. “Tsy miady amin’ny nofo amandra isika fa ny fanahy ratsy eny amin’ny rivotra” “Miambena ka tohero ny devoly” Jakoba 4:7 “Aza manome fitoerana ny devoly” Efesiana 4:27 “Mahonona tena, miambena: fa ny devoly fahavalonareo mandehandeha tahaka ny liona mierona mitady izay harapany” IPetera 5:8

(Miisa 33 ny teny hoe devoly ao amin’ny Baiboly; Jesoa moa dia tamin’ny faha-33 ny taonany no nanombohana azy tamin’ny hazo fijaliana) .Tsara tsindrina fa ny Mpiandry dia manatanteraka ny tenin’I Jesoa ary manara-dia izay rehetra nataon’ i Jesoa. Hanao asa lehibe noho ny nataon’I Jesoa ny Mpianany satria Izy mankany amin’ny Ray.

Matio 10:8 Sitrano ny marary, atsangano ny maty, diovy ny boka, avoahy ny demonia; efa nahazo maimaimpoana hianareo, koa manomeza maimaimpoana.

Matio 17:18 “Ary niteny mafy azy Jesosy, dia nivoaka taminy ny demonia, ka sitrana ilay zazalahy tamin’izay ora izay “.

Matio 8:31 “Ary ny demonia nifona tamin’i Jesosy ka nanao hoe: Raha avoakanao ary izahay, dia iraho hankany anatin’ireo kisoa andiany ireo “.

Matio 9:33 “Ary rehefa navoaka ny demonia, dia niteny ilay moana; ary gaga ny vahoaka ka nanao hoe: Tsy mbola nisy niseho toy izao tamin’ny Isiraely”.

Matio 12:22 “Dia nentina tany amin’i Jesosy ny lehilahy anankiray izay demoniaka, sady jamba no moana; dia nositraniny, ka dia niteny sy nahita ilay moana”.

Jakoba 2:19 “Hianao mino fa iray ihany no Andriamanitra; koa tsara izany ataonao izany, ny demonia koa mino izany ka dia mangovitra”.

Cet article a été posté le 7.3.2007 à 0:33 et est classé sous AIM-PANAHY. Vous pouvez consulter toutes les réponses à cet article via le flux RSS 2.0. Vous pouvez laisser une réponse ou effectuer un trackback à partir de votre propre site.